पश्चिम रुकुमको चौरजहारीमा भएको नरसंहार विरुद्ध सदन देखि सडक सम्म चौतर्फि बिरोध भएको छ । मंगलबार प्रतिनिधि सभामा दलित प्रतिनिधिहरुले गृहमन्त्री राम बहादुर थापा समक्ष रुकुम घटनाको घोर आपत्ति जनाउदै निष्पक्ष छानबिन गरी दोषीलाई कानुनी कारवाही गर्न माग गरेका थिए ।

दोषिलाई कारबाही गर्न दवाव दिने उदेश्यले स्वत स्फूर्त रुपमा नागगरिक समाज, मानव अधिकारकर्मी, दलित नागरिक अगुवा,बिभिन्न संघसंस्था, गैरदलित लगायतको सहभागिता रहेको थियो ।

भेरी नगरपालिका–४ जाजरकोटका नवराज विक गत शनिबार रुकुम पश्चिम चौरजहारी सोती गाउँकी मल्ल थरकी एक युवतीलाई विवाह गर्न भन्दै लिन पुग्दा गाउलेको सामूहिक आक्रमणबाट हत्या भएको दावी गरिएको छ ।

नवराज सहित ४ जनाको शव भेरी नदीमा भेटिएको छ । बुधबार मात्रै लोकेन्द्र सुनारको शव फेला परेको छ । यसअघि नवलराज विक सहित गणेश बुढामगर र चौरहजारी नगरपालिका–१ टीकाराम सुनारको शव फेला परिसकेको छ । घटनामा भेरी नगरपालिका वडा नं ११ का १८ वर्षीय सञ्जु (सन्दीप) विक र १७ वर्षीय गोविन्द शाही अझै वेपत्ता रहेका छन् भने १२ जना घाइते भएका छन् ।

त्यस्तै नेपालका लागि संयुक्त राष्ट्र संघकी आवासीय संयोजक भ्यालेरी जुलियान्डले रुकुम पश्चिमको घटनामा सरकारले निष्पक्ष रुपमा छानबिन गर्ने विश्वास व्यक्त गरेकी छिन् । उनले भनेकी छिन्, ‘म मृतकका परिवारप्रति समवेदना प्रकट गर्न चाहन्छु र विश्वास गर्छु कि नेपाल सरकारले संविधान र अन्तर्राष्ट्रिय प्रतिबद्धताबमोजिम शून्य सहनशीलता देखाउँदै यस घटनाको निष्पक्ष छानबिन गर्नेछ ।’ यो घटनालाई राष्ट्रिय मानवअधिकार आयोगलगायतले जातीय विभेद र मानवताविरोधी अपराधका रुपमा चित्रण गरेका छन् ।